Beda Venerabilis, De orthographia, {m}
| 1 | margarita femino genere et margaritum neutro dicendum. |
| 2 | in prouerbiis, inauris aurea et margaritum fulgens. |
| 3 | malogranatum et malum granatum consuete dicimus, et utroque modo declinantur; hoc malogranatum, huius malogranati, et haec malogranata, horum malogranatorum, his malogranatis, et cetera; et rursum hoc malum granatum, huius mali granati, et haec mala granata, horum malorum granatorum, et cetera. |
| 4 | miseret me senis, et misereor senis, et miseror senem. |
| 5 | misertus pauperis per genetiuum, miseratus pauperem per accusatiuum. |
| 6 | misereor autem compatior significat. |
| 7 | denique Graece dicitur συμπάσχω. |
| 8 | mereo honorem et mereor, et miles meret stipendium. |
| 9 | memini et memor sum honoris et honorem. |
| 10 | maritima sunt loca mari uicina, marina nauis uel belua. |
| 11 | metu tui et tuo. |
| 12 | materies artificiorum est, materia consiliorum. |
| 13 | alii contra referunt materiem esse animi, materiam arboris; materiem qualitatem ingenii, materiam fabris aptam. |
| 14 | mas in positione; masculus in diminutione, non mascellus, ut quidam. |
| 15 | muscus, herba quae in parietibus uel in corticibus arborum haeret, singulariter tantum effertur; memoria, malitia, murmur, similiter. |
| 16 | minae, manubiae, moenia, mapalia, quae sunt casae Afrorum, pluralia semper. |
| 17 | mare pluralem numerum non habet nisi tantum maria. |
| 18 | mel et mulsum et muria (id est, garos), et cetera liquida pretiosa tantum singularia, quamuis mella et uina legamus. |
| 19 | mature, maturius, maturissime dicendum; inuenimus tamen apud auctores etiam maturrime dictum. |
| 20 | munio munis perfectum facit munii et muniui. |
| 21 | memini, meministi, meminit, meminimus, meministis, meminerunt; et praesenti tempore et praeterito perfecto uno eodemque modo declinatur. |
| 22 | ideo corruptum siue defectiuum uocatur. |
| 23 | mulceo et mulgeo in unum perfectum ueniunt, mulsi. |
| 24 | maiestas cum scribis aut dicis, s secundae syllabae complicari debet. |
| 25 | sic in similibus. |
| 26 | miramur opera, admiramur uirtutes. |
| 27 | minores esse res aliquas aut homines dicimus; minoris emptum aut aestimatum quippiam recte scribimus. |
| 28 | memini me facere dicere debemus, non memini me fecisse; nam memini sermo est totus praeteriti temporis, qui ante actam rem in praesens reuocat, et si dixeris, memini me fecisse, duo praeterita simul iungis. |
| 29 | Virgilius uno tantum loco: namque sub Oebaliae memini me turribus altis Corycium uidisse senem. |
| 30 | quod poetae pro necessitate metri usurpare licuit. |
| 31 | meracam potionem dicimus quae merum aliunde recepit; merosum autem uinum appellamus. |
| 32 | muliebre dicitur a mulieribus aliquid factum; mulierarium per mulieres ordinatum et per uiros gestum. |
| 33 | merula non merulus dicendum. |
| 34 | Matthaeus et Matthias per duo t scribenda, quia Graeci per t et θ scribunt. |
| 35 | maestum animo, tristem aspectu dicimus. |
| 36 | malus (nauis) masculinum; malus (arbor frugifera) femininum est. |
| 37 | mendum neutraliter. |
| 38 | Varro in admirandis dixit, magnum mendum; sed Ouidius feminine, nocte latent mendae. |
| 39 | item: eximet ipse dies omnis e corpore mendas. |
| 40 | ergo mendum in mendacii significatione dicitur, menda in culpa operis uel corporis. |
| 41 | munificus est tamquam beneficus et maleficus; munifex autem tamquam opifex et artifex. |
| 42 | itaque munificus munera largitur; munifex autem munere fungitur. |
| 43 | morticina non dicuntur nisi mortuorum; mortalia uero etiam uiuentium corporum nomen est. |